Sjølv om vi ikkje har kome i gong med oppussing og opprusting av skulehuset, fekk vi planlagt og gjennomført eit kulturarrangement laurdag 27. juni 2009. Frå Trondheim kom fem medlemmer i teatergruppa Ngoma på vitjing til Ulla. Der framførte dei teaterstykket Pindia som dei har laga og øvd inn saman. Med i gruppa er Hilde Liv Bergh, Vigdis Skauvik Rian, Maja Reinåmo Olsson, Ida Pape Pedersen og Bendik Ulla. Dei gav oss ei fin teateroppleving med god musikk, levande dans, god skodespelkunst og framifrå scenografi. Det var to forestillingar. På den første kl 14 var det møtt opp 25 personar, og på den andre 37, til saman 62 i talet. Det var vi godt nøgde med, og stor applaus tyda på at publikum sette pris på det som vart framført.
Til alt overmål fekk vi strålande ver med sol, vindstille, varmt og godt. Dette gjorde at vi kunne ta kaffe, brus og kaker ute i det fri til flott musikalsk bidrag frå Leiv Ståle Aasebø på klarinett og Einar Longva på trekkspel. Vi avslutta med allsong saman med musikarane med "Hyldningssong til Ulla". Arrangementet og oppslutninga gir inspirasjon til fleire kulturinnslag på Ulla Skulehus.