Ullahammaren 1882

---

    Bestemor mi, Oline Halvarsdt Ulla f. Gjøsund (1876-1955) vart spesielt hardt råka av sjukdom og død. Oline var frå Eirik-garden på Gjøsund, Vigra. Ho vart gift i 1904 med odelsguten i Mette-garden på Ulla, Johan Andreasson Ulla (1875-1910). Johan fekk tuberkulose og vart innlagt på Reknes Hospital i Molde der han døydde 8. desember 1910. Johan og Oline fekk tre jenter, Vilhelmine, Antonette og Helene. Helene var berre knapt eitt år då faren døydde. Seinare fekk både Helene og Vilhelmine tuberkulose. Dei døydde då dei var 18 år, i 1923 og 1927.
    Den tredje søstra, Antonette vart ikkje sjuk. Ho vart gift med Ole Ullahamar og dei tok over Mette-garden. I mellomtida hadde Oline gifta seg med enkjemann Gustav S. Ulla (1882-1958) i Ingeleiv-garden i 1913. Han var først gift med Johanne Andreasdt Ulla (1880-1910) som var søster til Johan Andreasson i Mette-garden. Johanne og Johan døydde same året av tuberkulose i 1910. Gustav og Johanne fekk eitt barn: Sevrin G. Ulla (1909-1989). Han tok over Ingeleiv-garden. Altså var Helene og Sevrin søskenbarn. Helene miste far sin Johan i Mette-garden då ho var berre eitt år gammal, og Sevrin miste mor si Johanne i Ingeleiv-garden då han var eitt år.

---

    Familien i Framgard på Åkre vart også spesielt hardt råka av sjukdom og død. Lensmann Nils Nilsson Aakre (1866-1934) vart gift med Anna Oline Andreasdt Aakre f. Ulla (1871-1911) frå Mette-garden. Dei fekk fem jenter, og ingen vart gift. Den eldste, Kanute, døydde 36 år gammal av bronkitt i 1931. Anna Oline døydde 8. oktober 1911, berre 39 år gammal av hjerneslag. Yngste dottera Anna Vilhelmine fødd 16. juni 1911 døydde 19. oktober 1911, 11 dagar etter at mora Anna Oline døydde.
    Nils gifte seg oppatt i 1919 med Anna Larsdt f. Røsvik (1871-1954) frå Ola-garden, Røsvik, Vigra. Dei fekk ikkje barn. Mor til Anna Larsdt var forresten Anne Andersd. Røsvik, f. Ulla (1828-1921) frå Mette-garden på Ulla. Anna Larsd. var tvillingsøster til Laura Jakubie i Ola-garden i Røsvika. Anna og Laura budde i kårstova i Ola-garden og tok seg av mora Anne som døydde i 1921, 92 år gammal. Anna gifte seg med Nils i 1919, men etter at Nils døydde i 1933, kjøpte Anna og Laura seg eit hus i Borgundvegen i Ålesund.     
    Det var altså ingen av etterkomarane som kunne ta over Framgard på Åkre etter Nils Nilsson Aakre. Det vart slik at ein slektning frå Åmundgarden på Haram tok over garden. Det var KOK som han vart kalla: Karl Olav Karlson Haram (1897-1987) gift med Agnes f. Melchior (1904-1995) frå Norddal. KOK og Agnes fekk 6 born: Nils, Kjell, Magne, Bjørn, Geir og Kari Alvhild. Nils (1931-2010) tok over Framgard. Han vart ikkje gift. Kari Alvhild Haram eig Framgard i dag (2025).
    Nedanfor har eg teke med ein del foto frå Framgard i Nils og Anna Oline si tid.

Lensmann Nils Aakre	Kanute
Vilhelmine (1897-1908) vart 10 år   Kanute (1894-1931) vart 36 år	Kanute og tante Petrine i Petter-Framgard Petrine var søster til Anna Oline, mor til Kanute
Kanute (1894-1931)	Marie (1904-1923) vart 19 år Kanute (1894-1931) vart 36 år