Fyrvaktarar
E. M. Torgersen (f. 1858)
fyrvaktar frå 8.
august 1899 til 21. august 1918
Faksimile av folketeljinga for Haram herred for 1900 med
opplysningar om dei som budde på Kvernholmen, g.nr. 10
br.nr. 2 og 12.
E. M. Torgersen avløyste
Ole A. Rønnestad som fyrvaktar på Ulla fyr i
1899. Torgersen var gift med Gina og hadde ei dotter som
heitte Elisa. Familien Torgersen var frå
Bergen. Guvernanta, som heitte Olava Nilsen, var frå
Karmøy.
På fotografiet til venstre ser vi fyrvaktar Torgersen
saman med kona Gina. Foto utlånt av Per Ulla.
Til høgre eit fotografi av fire personar som gjekk
på navigasjonskurs hos Torgersen på
Kvernholmen. Bak til venstre: Karl Ingvald Karlson Ulla
frå Lars-garden. Framme til venstre: Hans
Petterson Ulla frå Sjur-garden. Dei to andre kjenner
eg ikkje namnet på. Dei er truleg frå
fastlandet. Torgersen var kjend som ein dyktig fagmann.
Han var høgt respektert og dreiv med kursing i navigasjon
ute på fyret på Kvernholmen i mange år.
Vi veit at Ingvald Tomren frå Ullahammaren lærte seg
å navigere av Torgersen på Ulla fyr.
|
|
Fotografia over er to utsnitt av fotografiet av
brudefølgjet til Jenny og Ola Strømme frå
Kari-garden på Ulla i 1909. På bildet til
venstre ser vi Gina Torgersen til høgre framme, dottera
Elisa til venstre. Bak står Gustav Sevrinson Ulla.
På bildet til høgre ser vi fyrvaktar E. M. Torgersen.
Elisa Torgersen var svært musikalsk. Ho brukte å
spele orgel når det var fest på Ulla skule.
Dette var på festar som vart arrangert av ungdomslaget UL
Sambandet. Såleis ser vi i møteboka for UL
Sambandet den 22. desember 1907 der det står: "Variert
program med orgelmusikk av Elisa Torgersen".
Torgersen hadde ein hund som heitte "Luks", og borna på Ulla
hadde ein viss skrekk når hunden kom saman med fyrvaktaren.
Torgersen var snill og gåvmild; det vanka ofte julegodt
frå familien Torgersen.
