Ullahammaren 1882

   Etter kvart som Svendsen-familien vart større, vart det dårleg med plass i Gamle Svendsen. Laurits Svendsen bestemte seg derfor for å byggje nytt hus sør for Gamle Svendsen. Laurits og Thomasine hadde då alt to barn: Karl og Karen. Laurits Svendsen bygde Nye Svendsen i 1918. Tømmeret kjøpte han i Skodje-bygda. Det var Jubb-Sevrin (Sevrin K. Ullahammer) som førde tømmeret til Ulla med båten sin, "Svalen". Laurits lagra tømmeret på oppsida av Elias-buda under eit provisorisk tak. Slik låg det til våren 1918 då han starta bygginga. Fotografiet ovanfor er frå 1937, vi ser Nye Svendsen i framkant til venstre mellom Gamle Svendsen og Hytta. Opphavleg var altså Nye Svendsen identisk med Kari-stova litt lenger nede i Ullahammaren og også Åkre-stova. Både Nye Svendsen og Åkre-stova vart påbygde og ombygde. Åkre-stova i 1920-åra, og Nye Svendsen etter andre verdskrigen. Av fotografiet ser vi elles at glasføringa vart endra ved ombygginga. På bildet er det parallelle vindauge oppe i hovudetasjen med vindauga i kjellaren. Ombygginga viser ein spesiell, og kanskje noko merkeleg arkitektur. Men alltid ved slike bygningsmessige endringar var grunnen at ein ville ha meir plass. Det hadde seg slik at Karl Svendsen var blitt trulova med ei dame som heitte Fanny frå Kristiansund. Ho var aktiv i Frelsesarmeen. Planen var at ho skulle flytte til Ulla saman med Karl. Han sette derfor i gong med utbygging av Nye Svendsen for å få betre plass til familien. Men så gjekk dessverre forholdet til Fanny over styr, og det vart ikkje noko par av dei. Etter at gamlefolket døydde vart det god plass til søskena Karl og Karen Svendsen som begge var ugifte.

SLEKTSBOK

Laurits Knutson Svendsen  (1878-1957)

Gift med Thomasine Svendsen f. Krogsæter  (1879-1963) frå Vatne.

Barn:

Etter at Karl og Karen døydde, tok søstrene Astrid Aarseth og Elfrid Kleive over Nye Svendsen. Bestemor deira heitte Anna Vestvik f. Svendsen. Ho var søster til Laurits Svendsen. I 2008 tok Elfrid Kleive over Nye Svensen åleine.