Petrine vaks opp i Jubb-stova på Ullahammaren, då ho var ung. Ho fekk ei jente utanfor ekteskap, Svanhild (1907-1986). Barnefaren heitte Haldor Olson Olsnes (1884-) frå Brudvik i Hordaland, men Haldor svikta Trine og reiste frå henne då Trine vart med barn. Trine budde då saman dottera Svanhild i Jubb-stova. Ho fekk seg arbeid som postdame på Ullahammaren. Postkontoret låg i den vestre enden i Gamlestova mot Ullagarden. Men då Sevrin og Laura gifta seg i 1920, var der ikkje plass til Trine og Svanhild lenger, og dei flytta inn i Gamlestova.

Samuel var  først gift med søskenbarnet til Sevrin og Trine frå Gjøsundsæter på Valderøya. Kona til Samuel døydde i 1922, og i gravferda hennar møtte Samuel Trine. Dette møtet førte til at dei gifta seg, men dei fekk ikkje barn saman.  Etter at dei gifta seg, flytta Samuel, Trine og Svanhild til Ålesund. Der budde dei i eit hus som Sevrin åtte i Keiser Wilhelms gate 62 i Ålesund. Samuel reiste til Amerika to gonger. Då han kom tilbake frå Amerika, kjøpte han hus i Fjellgata 32 i Ålesund.

Svanhild var sterkt knytt til røtene sine frå Ullahammaren og Jubb-stova. I 1953 fekk Svanhild og Leiv Aasebø høve til å kjøpe ei tomt på Ullahammaren, nærare bestemt på Brisingberget. Tomta vart skilt ut frå Negard på  Ulla. Svanhild og Leiv fullførte bygginga i 1954 på den finaste utsiktstomta. Huset vart sett opp av Sverre Austnes. Når taket var tett, spanderte byggherren Aasebø ein fest for handverkarane etter gammal tradisjon. Dette vart kalla kranselag ved at snekkaren festar ein krans eller busk i mønet på taket.